КҮЙ ҚАҒАНЫ, ҰЛАҒАТТЫ ҰСТАЗ - РЫСПАЙ ҒАБДИЕВ

Х.Досмұхамедов атындағы Атырау университетінің ұстазы, Қазақстанның халық әртісі, «Парасат» орденінің иегері, дәулескер күйші, дирижер Рыспай Ғабдиевтың шығармашылғына арналған дөңгелек үстел жиыны өтті. Жиынға өнерпаздың көзін көрген замандастары, музыка зерттеушілері, зиялы қауым өкілдері мен шәкірттері, универистеттің оқытушы-профессорлары және студенттер қатысты. 

Дауылпаз домбырашы, өнер зерттеушісі, ғалым Рыспай Ғабдиев – Қазақ халқының дәстүрлі күйшілік өнер мектебінің көрнекті өкілдерінің ізін жалғаған дәулескер күйші. Оның репертуары арқылы Құрманғазының "Терісқақпай", "Төремұрат", "Байжұма", "Адай", "Аман бол, шешей", "Қайран шешем", "Машина", Динаның "Бұлбұл", "Байжұма", Дәулеткерейдің "Байжұма", "Қос ішек", "Көркем ханым", "Кербез Ақжелең", "Кероғлы", Сейтектің "Ақсақ құлан", Есбайдың "Ел айырылған", Ерғалидің "Қоштасу", Қазанғаптың, Абылдың күйлері, халық шығармашылғының жауһарлары бүгінгі ұрпаққа жетті. «Биыл батыс күй мектебінің дүлдүлі, Атырау өңіріндегі күйшілікті әлемге танытқан өнердің ұлы тұлғасы – Рыспай Ғабдиев Атырау университетімен, сол кездегі Гурьев педагогикалық институтындағы еңбек жолын 1980 жылдан бастайды. 1980-1990 жылдары – 10 жыл бойы оқу орнының музыка және педагогика факультетінің деканы болып қызмет атқарды. Бүгінде күйшінің орындауындағы шығармалар топтамасы 3 күйтабаққа жинақталып, "Байжұма" деген атаумен жарық көрді.  Бұдан бөлек, ғалым ұстаз "Балалар оркестрімен жұмыс", "Домбырадан сабақ беру тәсілі" сынды бірнеше еңбектің авторы. Оның артында қалған мол мұрасы музыка зерттеушілері үшін, маман даярлау ісінде ұдайы бағыт-бағдар болып келді», - деді Басқарама төрағасы-ректор Саламат Идрисов. 

Жиынға қатысқан күйші Рыспай Ғабдиевтің замандастары Атырау облысының Құрметті азаматы Нұрпейіс Мақашев, Атырау облысының Құрметті азаматы,  «Құрмет» орденінің иегері Зұлпыхар Сүйнешов, Мақат ауданының Құрметті азаматы, ҚР білім беру ісінің үздігі, Р.Ғабдиев атындағы балалар саз мектебінің ардагер ұстазы Естай Ғинаятов өнерпаздың өнегелі өмірінен сыр шертетін естеліктерімен бөлісті. Ал, айтыскер ақын, ҚР еңбек сіңірген қайраткері, «Құрмет» орденінің иегері Мэлс Қосымбаев дәулескер күйшіге арнап арнау айтты.   Бұдан  бөлек, өнер қайраткерінен тәлім алған шәкірттері өнер көрсетті.

Тізімге қайта оралу