Педагогика ғылымдарының кандидаты Шұғаева Гүлшат Қоныратқызы - мерейлі 60 жаста!
Х.Досмұхамедов атындағы Атырау университетінде қауымдастырылған профессор, педагогика ғылымдарының кандидаты Шұғаева Гүлшат Қоңыратқызының 60 жас мерей тойына арналған «Инклюзивті білім беру жағдайында ерекше қажеттіліктері бар балаларды психологиялық - педагогикалық қолдау» атты ғылыми- әдістемелік семинар өтті.
Психология және педагогика кафедрасының ұйымдастыруымен өткен жиынға отандық оқытушы-профессорлар, магистранттар мен студенттер қатысты.
Гүлшат Қоңыратқызы – Атырау университетінде 35 жыл еңбек еткен ұлағатты ұстаз, педагогика және психологияның өзекті мәселелеріне арналған 1оқулық, 2 оқу-әдістемелік құралы, 4 оқу құралы, 60-қа жуық ғылыми мақаланың авторы, ҚР Білім және ғылым Министрлігінің Құрмет Грамотасының, 2021 жылғы «Жоғары оқу орнының үздік оқытушысы» атағының, «Білім беру саласының үздігі», «Үздік ғылым қызметкері», 2024 жылғы «Ғылымды дамытуға сіңірген еңбегі үшін» төсбелгілерінің иегері.
Іс-шара университет ректоры Саламат Идрисовтің құттықтау сөзімен басталды.
«Баяндамама кіріспес бұрын Гүлшат ханымды құттықтағым келеді. Дүниежүзіндегі инклюзивті білім беруді жақсырақ түсіну үшін соңғы бірнеше жыл бойы доктор Гүлшат Шұғаевамен және басқа да Атыраулық ғалымдармен жұмыс жасау мен үшін мәртебе болды. Жұмыс барысында Доктор Гүлшат Шұғаеваны талантты, әрі сенімді әріптес ретінде таныдым. Ең бастысы, достық қарым-қатынасымызды қатты бағалаймын»,- деп ризашылығын білдірді Канада мемлекеті Саймона Фрейзер (Simon Flazer) университетінің профессоры Роберт Уильямсон.
Инклюзивті білім беру мәселесін талқылауда Канада мемлекеті Саймона Фрейзер (Simon Flazer) университетінің профессоры Роберт Уильямсон, Х.Досмұхамедов атындағы Атырау университеті әлеуметтік мәселелер және жастар саясаты жөніндегі проректор, қауымдастырылған профессор, педагогика ғылымдарының кандидаты Ляйля Ерболатовна, Атырау облысы Білім беру басқармасы әдістемелік орталығы инклюзивті және арнайы білім беру бөлімінің басшысы Гульжанар Мендыгериевна, Әлеуметтік кәсіпкер, «Сенім тірегі» қоғамдық қорының төрайымы, АВА терапист маманы, АФК инструкторы, Атырау және Құлсары қалаларындағы «Future Sport» абилитациялық орталығының жетекшісі Самал Аманжолқызы, Ә.Молдағұлова атындағы №22 жалпы білім беретін орта мектебі инклюзивті қолдау кабинетінің меңгерушісі, логопед Рыскуль Жексеновна, Х.Досмұхамедов атындағы Атырау университеті инновациялық білім беру факультеті психология және педагогика кафедрасының аға оқытушысы, магистр Жанар Серіккалиевна, «Жүректен жүрекке» қоғамдық қоры жанынан ашылған «Венера» инклюзивті дамыту орталығының директоры Гүлбарам Саматқызы, Педагогика және психология мамандығының 2-курс магистранты Инирбаева Эльзана сынды зерттеуші-ғалымдар баяндама жасаса, «Тұран-Астана» университеті әлеуметтік ғылымдар және тілдік пәндер кафедрасының қауымдасырылған профессоры, педагогика ғылымдарының кандидаты Бегаим Жиентаевна мен Қ.Жұбанов атындағы Ақтөбе өңірлік университеті мектепке дейінгі және бастауыш оқыту кафедрасының меңгерушісі, педагогика ғылымдарының кандидаты, профессор Гульшат Рахметжановна құттықтау сөз сөйледі.
«Ғылымда өзіндік қолтаңбасы бар, ғалым-ұстаз, профессор Гүлшат Қоңыратқызын ерекше қадір тұтып, бағалаймын. Жас мамандарға, студенттерге өз қамқорлығы мен тәжірибесін беруде, еңбек жолында, ұйымдастыру жұмыстарында адамгершілік пен ізгілікті негізгі принцип етіп ұстаған жан деп білемін. Өйткені, Гүлшат Қоңыратқызынан білім мен тәрбие алған, тәжірибе алмасқан адамның осал болмайтынын да байқап жүрміз», - деп ерекше ықыласын жеткізді «Тұран-Астана» университеті әлеуметтік ғылымдар және тілдік пәндер кафедрасының қауымдасырылған профессоры Бегаим Жиентаевна.
Ғылыми семинарға арқау болған педагогика ғылымдарының кандидаты Гүлшат Қоңыратқызы «Болашақ мамандарды ЖОО-да инклюзивті білім беру жағдайына дайындау жолдары» тақырыбын талқылап, мазмұнды баяндама жасады.
Іс-шара соңында жиынға қатысушылар ғалымды мерей тойымен құттықтап, ықылас-тілектерін жеткізіп, гүл шоқтарын табыстады.
ПІКІРЛЕР