Түркістанда ЖОО қызметкерлері біліктілігін арттырды
Х.Досмұхамедов атындағы Атырау университетінің профессор-оқытушылары Түркістан қаласында өткен «Ғылым, білім беру, көшбасшылық: жобаларды стратегиялық басқару» атты біліктілікті арттыру курсына қатысты.
Инновациялық білім беру факультетінің деканы, п.ғ.д., профессор Ақмарал Муханбетжанова, экономика және құқық факультетінің оқу ісі жөніндегі декан орынбасары, қаржы және есеп кафедрасының сеньор-лекторы, магистр Самал Альдешова, жаратылыстану ғылымдары факультетінің оқу ісі жөніндегі декан орынбасары Сәнше Мәден сынды білікті мамандар курсқа қатысуды онлайн форматында бастап, Қожа Ахмет Яссауи атындағы Қазақ-Түрік университетінде оффлайн форматында аяқтады.
С.Сейфуллин атындағы Қазақ агротехникалық университеті, Қожа Ахмет Яссауи атындағы Қазақ-Түрік университеті және Х.Досмұхамедов атындағы Атырау университеті базаларында өткен 120 сағаттық курс мақсаты – ЖОО-дарының басқару саласындағы декандар мен құрылымдық бөлім жетекшілерінің біліктілігін арттыру, білім берудегі сапа менеджментін, білім берудегі тәуекелдерді қарастыру арқылы жобаларды басқару дағдыларын тәжірибеде қолдануды игеру.
ISMA қолданбалы ғылымдар университетінің профессоры Алла Киселеваның жетекшілігімен өткен курс барысында білім берудегі ITIL және PRINCE 2 тәжірибелеріне негізделген жобаларды басқару дағдыларын, білім беру (ББ) дағдылары ретінде сапа менеджментін, ББ-дегі ресурстарды басқаруды, ББ-дегі АТ инфрақұрылымын басқаруды теория жүзінде меңгерсе, практикалық сабақтарда бизнес-кейстер бағдарламасын құру, каскадтау және зерттеу жұмыстарын игерді.
«Ыңғайлы форматта ұйымдастырылған біліктілікті арттыру курсы профессор-оқытушылардың алдағы уақытта басқару саласындағы қызметтерінде жаңа мүмкіндіктерге жол ашатыны сөзсіз»,- деп ризашылығын білдірді курсқа қатысушылар.
Курс соңында қатысушыларға сертификаттар табысталып, мамандар Қожа Ахмет Яссауи кесенесін, «Әзірет Сұлтан» ұлттық тарихи-мәдени мүзей қорығын, Орталық Азиядағы ең ірі «Керуен-сарай» көпфункционалды туристік кешенін тамашалауға мүмкіндік алды.
ПІКІРЛЕР