Университет студенттерінің экологиялық жобалар көрмесі өтті
Х.Досмұхамедов атындағы Атырау университеті студенттерінің экологиялық мәселелерді шешуге арналған инновациялық жобалар мен креативті арт туындылар көрмесінің БАҚ өкілдеріне арналған презентациясы өтті.
«Таза Қазақстан» жалпыұлттық экологиялық акциясы аясында өткізілген шараға БАҚ өкілдері, профессор-оқытушылар мен студенттер қатысты.
Экологиялық мәселелерді шешуге бағытталған көрме мақсаты –қазақстандықтарды табиғатқа қамқор болу идеясының төңірегіне біріктіре отырып, оң нәтижеге жету үшін студенттік ғылыми жобалар мен экологиялық саладағы зерттеу нәтижелерін тарту.
Көрме барысында Дмитрий Ургарчев пен Азиза Жиенбаеваның авторлығымен «Күкірт қалдықтарынан күкірт бетонын жасау», Дильназ Досмұхамбетова мен Дмитрий Ургарчевтің авторлығымен «Биопластик жасау», Батырхан Қазбағаров, Диар Жолдасқали, Мұратбек Сабидолланың авторлығымен «Темекі қалдықтарын пайдалана отырып, тас төсеніштер өндіру», Ақмарал Сағынғалиева, Жамила Ахмадиева, Шұғыла Аманкелді және Іңкәр Мұқанованың авторлығымен «Шыны қалдықтарын пайдалана отырып, эпоксидті шайырдан бұйымдар жасау» жобалары көпшілікке таныстырылды.
«Темекі қалдықтарын ешкім өңдемейді. Біз соларды жинап алып, құрылысқа қажетті бұйымдарды жасаймыз. Ол үшін бізге керегі тек темекі тұқылы, әйнек қалдықтары және топырақ. Ең жақсы нәтижеге жету үшін топырақты әртүрлі жерден аламыз. Темекі тұылдарынын радиоактивті химиялық улы заттар бөлінетіндіктен, біз оларды пайдаға жаратып, бір жағынан еліміздің экологиясына өз үлесімізді қосып жатырмыз» - деді жоба авторларының бірі Мұрабек Сабидолла.
«Шыны қалдықтарын пайдалана отырып, эпоксидті шайырдан бұйымдар жасау» жобасының авторлары қалдықтардан бұйымдарды жасау барысын көрсетіп, шеберлік сағатын өткізді.
«Біздің мақсатымыз – шыны қалдықтарын кәдеге жарату. Шыны қалдықтарын уату арқылы әйнекке екінші өмір сыйлап, эко бұйымдар жасау табиғатқа зиянсыз. Бұл жобамыз экологиялық мәселелерді шешіп қана қоймай, ұйымдасып жасаған төртеуміздің де шығармашылық тұрғыдан шыңдалуымызға пайдасын тигізді»,- деді жоба авторларының бірі Ақмарал Сағынғалиева.
Бұл жобалар студенттердің теориялық білімдерін тәжірибемен ұштастыра отырып, өңірдің өзекті экологиялық проблемаларын шешуге қосқан үлесі ретінде бағаланды.
«Сіздер экологиялық мәселелерді шешіп қана қоймай, экология мәселесіндегі инновация мен шығармашылықтың күшін көрсеттіңіздер. Атырау университеті сіздерді мақтан тұтады, және сіздерге қаржылық, әдістемелік және ұйымдастырушылық қолдау көрсетеді ден сенемін. Сіздердің еңбектеріңіз - еліміздің жарқын болашағына қосылған үлес және бастамаларыңыз басқаларды да шабыттандыратынына сенімдімін!», - деп жас өнертапқыштарға ризашылығын білдірді қауымдастырылған профессор Мансия Есенаманова қорытынды сөзінде.
Іс-шараның жалғасы ретінде атыраулық жастар университеттің Жайық өзені жағалауы жағында тазалық жұмыстарын жүргізді.
ПІКІРЛЕР