10 желтоқсан – Халықаралық адам құқықтары күні
Х.Досмұхамедов атындағы Атырау университетінде «Адам құқықтары және оны қорғаудың өзекті мәселелері» тақырыбында кездесу өтті. Кездесуге құқықтаушы, теолог ғалымдар мен полиция басқармасының өкілдері, профессор-оқытушылар мен студенттер қатысты.
Азаматтық құқықтық пәндер кафедрасының ұйымдастыруымен өткен шарада 10 желтоқсан – Халықаралық адам құқықтары күнінің маңызы мен шығу тарихы, бүгінгі Қазақстан қоғамындағы аталған мәселенің өзектілігі жайында сөз қозғалды. «Бүгінгі таңда БҰҰ-ға мүше мемлекеттердің конституцияларында адамның негізгі құқықтарын жалпыға бірдей тану адамға және оның құқықтарына деген ең жоғары құрметті көрсетеді. 2023 жылы 8 желтоқсанда адам құқықтары саласындағы іс-қимыл жоспары туралы жарлық қабылданды. Бұл жоспарды табысты жүзеге асыру үшін мемлекеттік, халықаралық ұйымдар мен ел азаматтарының күшін біріктіру керек болады. Біз өзімізге және балаларымызға қолайлы қоғам құруға ұмтылуымыз керек», - деді Азаматтық құқықтық пәндер кафедрасының меңгерушісі Үздік Идресова.
Іс-шара барысында психология және педагогика кафедрасының қауымдастырылған профессоры Нұрсұлу Иманғалиева, «Шапағат деструктивті діни ағымдардан жапа шеккендерге көмек орталығы» қоғамдық қорының теологы Думан Күмісбек, Атырау облысы полиция департаменті тергеу басқармасының тергеушісі, полиция майоры Фархат Аруов, Х.Досмұхамедов атындағы Атырау университеті психологиялық қызмет көрсету орталығының психологы, арттерапевт Анар Сагинбаева, Атырау облысы полиция департаментінің есірткі қылмысына қарсы іс-қимыл басқармасының аға жедел уәкілі, полиция подполковнигі Нұрболат Джансариев сынды мамандар баяндама жасады.
Жиында тұрмыстық зорлық-зомбылық, қанағатшылдық пен ысырапшылдық, вандализм мен интернет алаяқтық, лудомания, нашақорлық сынды өзекті мәселелер ашық талқыланып, қатысушылар тарапынан білім бағдарламасына арнайы пән енгізу, қоғамда кезекші еріктілер тобын құру секілді ұсыныстар айтылды.
Кездесу соңында ұйымдастырушылар арнайы келген қонақтарға ризашылығын білдіріп, естелік суретке түсті.
ПІКІРЛЕР