- Басты бет
- МЕДИА-РЕСУРСТАР
- Жаңалықтар
- Қазақ уикипедиясын дамытудың маңыздылығы айқындалды
Қазақ уикипедиясын дамытудың маңыздылығы айқындалды

Х.Досмұхамедов атындағы Атырау университетінде «Қазақ уикипедиясын дамытудың маңыздылығы» атты республикалық семинар өтті.
Ашық энциклопедия жұмысын жетілдіруге бағытталған тәжірибе алаңында цифрлық кеңістікте қазақ тілінде жан-жақты жетілдірілген, мазмұнды мақалалар енгізудің жолдары талқыланып, энциклопедиялық білім қорын қазақ тілінде қамтамасыз етудің маңыздылығы сөз етілді.
Республикалық жиынға ҚР Президенті жанындағы мемлекеттік басқару академиясының Атырау облысы бойынша филиалы, Облыстық басқарма басшылары, білім басқармасы басшылары, Х.Досмұхамедов атындағы Атырау университетінің профессор-оқытушылар құрамы, университет Жас ғалымдар кеңесі мүшелері, Халықаралық «Қазақ тілі» қоғамының Атырау облыстық филиалы мүшелері, БАҚ өкілдері қатысты.
Уикипедия - қазіргі таңда интернеттегі ең ірі, әрі әйгілі энциклопедия. Қазақ уикипедиясы 2002 жылы пайда болды, бірақ оған алғашқы мақалаларды жазу 2005 жылдың сәуір айынан басталды.
«Қоғамымыз түгелге жуық Уикипедия жөнінде хабардар, әрі керек мәліметін де осы жерден таба алады. Қазір бұдан артық энциклопедиялық қор жоқ десек қателеспейміз. Уикипедияда әлемнің 285 тілінде 35 миллион мақала бар. Соның ішінде Қазақ уикипедиясы әлемдік рейтинг бойынша 49 орында тұрақтаған. Қазақ тіліндегі мақала саны – 238 мыңнан астам. Уикипедияны қолға алудың басты қажеттілігі – қазақ тіліндегі ғылыми қорды, ақпарат көздерін дамыту. Өскелең ұрпақ өз тілімізді жетік меңгеруін қаласақ, қазақ тілін цифрландыруға көшу керек»,- деді ҚР Ғылым және жоғары білім министрлігі Тіл саясаты комитетінің төрағасы Ербол Тілешов кіріспе сөзінде.
Қазақ уикипедиясының Атырау өңірі бойынша белсендісі Мағыпар Қуанов, Уикипедия әкімшісі (аудармашы) Батырбек Әлімжанов, Атырау облысы Мәдениет және тілдерді дамыту басқармасының бөлім басшысы Айгүл Қуаныш, қазақ тілі және әдебиеті кафедрасының аға оқытушысы Ақмарал Дауткулова сынды спикерлер Қазақ уикипедиясының қазіргі жағдайы мен болашағы, қазақ тілін ғылым тіліне айналдыру мен қазақ тілінің цифрлық кеңістіктегі болашағы жөнінде толымды баяндама жасап, жүйелі ой бөлісті.
«2000 жылға дейін кітап энциклопедияларды пайдаланып келсек, ғаламтордың келуімен ашық энциклопедиялық қор Уикипедия жұмысы қолға алынды. Уикипедия арқылы керекті ақпаратты тауып қана қоймай, уақытымызды да үнемдейміз. Онымен қоса ашық қорда ақпарат көздері күн сайын жаңарып, толығып отыратыны өте қолайлы. Қазіргі рейтингке зер салсақ, қазақ тілді мақалалар саны азайып кетті. Осы орайда ғалымдарды жұмылдырып, мақалаларды өңдеу мен жазу жұмыстарын жандандыруды қолға алу керек. Қазақ тілді контенттерімізді көркейтетін жұмыстарымыз жандана берсін!»,- деді Қазақ уикипедиясының Атырау өңірі бойынша белсендісі, ғалым Мағыпар Қуанов.
Жиында Х.Досмұхамедов атындағы Атырау университетінің Басқарма төрағасы - ректор Саламат Идрисов Атырау облысында өткен «Сарайшық – бабалар мұрасы» жобасын сәтті іске асыруға үлес қосқаны үшін Лаура Ғазизова, Гүлназ Кәрімжан, Орынгүл Махмуд, Болат Бисенғалиев, Жанат Қырықбаева, Арман Жұмағазиев сынды қоғам белсенділеріне Халықаралық «Қазақ тілі» қоғамдық бірлестігі Астана қалалық филиалы мен Ахмет Байтұрсынұлы атындағы тіл білім институты тағайындаған «Ахмет Байтұрсынұлы» төсбелгісін табыс етті.
«Қазақ тілін ғылым тіліне айналдырудың бірден-бір жолы - ғылымның барлық саласындағы ақпаратты қазақ тілінде цифрландыру»,- дей келе, қазақ тілі және әдебиеті кафедрасының аға оқытушысы Ақмарал Дауткулова жасанды интеллектті қазақ тілінде сөйлетті.
Ғылыми семинар соңында қатысушылар пікір алмасып, естелік суретке түсті.
ПІКІРЛЕР