03.05.2024 125

Атырау облысындағы Жайық өзенінен төнген су тасқынына қарсы бөгет салу жұмыстарына Халел Досұмхамедов университетінің қызметкерлері мен студенттері де белсене қатысты. Атырау облысындағы төтенше жағдайға байланысты құрылған Жедел штаб университет ұжымына Атырау қаласынан 20 шақырым қашықтықтағы Алмалы ауылдық округіне қарасты аумақтан 5 шақырым бөгет салуды тапсырды. Бөгеттің 3200 метрі тыңнан тұрғызылды. Алмалыдағы бөгетті салуға 2000 астам белсенді студент, 250 униерситет қызметкері қатысты. Еріктілер күн сайын екі ауысыммен жұмыс істеді. Олар 150 мыңға жуық қапқа топырақ толтырып, арнайы мамандар бекіткен әдіспен бөгетті қапшылықтармен қалап шықты. Университет бөгет жұмысына қатысқан барлық студенттер мен қызметкерлерді күнделікті үш мезгіл ыстық тамақпен қамтамасыз етуді ұйымдастырды. Жұмыс алаңы маңынан тамақтануға арнап киіз үй және шатырлар тігіп, көшпелі вагон мен түнгі жұмыстар үшін электр қуатын қойды. Бөгетті тұрғызуға "JM Capital" компаниясы 22 техникасын және оны басқаруға кәсіби мамандарын жұмылдырып, толықтай аяқталғанға дейін үздіксіз жұмыс істеді. Сондай-ақ, "Казсервис" компаниясы қосымаша 6 техникасын көмекке жіберді. Бұдан бөлек, тосқауыл бөгетті салуға «Отар» әскери базасының сарбаздары да көмекке келіп 4 күн қарқынды жұмыс жасады. 6 сәуірден басталған бөгет салу жұмысы үзіліссіз, тоқтаусыз жүргізіліп 25 сәуірде толықтай аяқталды. Бөгет тағанының қалыңдығы 12 метр, биіктігі 6 метр, жалпы ұзындығы 5 шақырым, 200 метрді құрады. Университет ұжымы тұрғызған бөгет Жайықтан тасыған суды Алмалы елді мекеніне жібермей бөгеп, Сарыөзек каналы арқылы Атырау қаласының солтүстік батысымен Каспий теңізіне тікелей апарып құятын – маңызды тосқауылдың бірі. Х.Досмұхамедов атындағы Атырау университеті тасқын судан зардап шеккен аймақтардан эвакуацияланған азаматтар үшін 860 орын дайындады. Қауіпсіз орындар университетке тиесілі жатақханалардан әзірленді. Онда медициналық орталық, психологиялық көмек, демалыс бөлмелері және асхана жасақталған. Қазіргі таңда су тасқыны болған аумақтан келген 48 студент орналасты. Олардың қатарында Ақтөбе облысынан – 2, Батыс Қазақстан облысынан - 3, Құлсары қаласы және аудандарынан – 42 азамат тұрып жатыр. Халел Досмұхамедов университетінің 9 ғалымы облыстағы Жедел штаб жанынан құрылған ғалымдар тобымен бірге жұмыс істеп келеді. Жедел штаб жанында зерттеуші ғалымдар тобы ҚР Ғылым және жоғары білім министрі Саясат Нұрбектің тікелей тапсырмасымен құрылып, Қазақстанның өзге аймағындағы білікті мамандарымен толықты. Олар Жайық өзенімен Ресейден келе жатқан тасқын судың мөлшерін, қарқынын есептеп Атырау облысына қанша уақытта жететіндігіне ғылыми тұрғыда болжам жасады. Сонымен қатар, ғалымдар Жайық өзенінің теңізге құяр тамағын түп тереңдету жұмыстарының сапасын бақылап, өзендегі судың көп мөлшерін каналдарға бұру, бөгетті берік әрі тиімді салудың жолдарын пысықтап, штабқа ұсыныстар беріп, қолдануға ықпал етті. Ғалымдар тобы төтенше жағдайдың алдын алу және оны болдымау мақсаттында Жедел Штаб жанындағы ғылыми жұмыс қорытындысы бойынша бірқатар ұсыныстар әзірлеп, алдағы уақытта іске асыруды көздеп отыр.

Тізімге қайта оралу