11.03.2024 246

   «Мен жастарға сенемін!». Осындай атаумен Х.Досмұхамедов атындағы Атырау университетінің акт залында Атырау облысы "Жастар Рухы" Жастар қанатының ұйымдастыруымен Алаштанушы, «Дарын» жастар сыйлығының лауреаты Елдос Тоқтарбай және актер, «Міржақып, Оян қазақ» фильмінің бас кейіпкері Бақыт Қажыбаевпен жүздесу өтті.  Еркін форматта өткен кездесуге оқытушы профессорлар, студенттер және ҚХА Аналар кеңесі мен «Қазақ аналары - дәстүрге жол» қоғамдық бірлестігінің мүшелері қатысты.

Диалог алаңының басты мақсаты – тарих пен тағылымды ұштастырып, жастарға жаңа рух сыйлау. Кездесуде Алаш арыстарының еңбегі, ұлттық идеясы, қазақ қоғамының бүгінгі деңгейі мен ұлтқа деген махаббаты туралы әңгіме өрбіді. Жалынды жастар осы бағытта өздерінің толғандырған көкейкесті сауалдарын қойып, толығырақ жауап ала алды. Алаштанушы Елдос Тоқтарбайға «Алаштану үшін нақты қандай бағытта жұмыс жасау керек?» деген сауалымызға ««Башқұрт» ұлт-азаттық қозғалысының саяси жетекшісі, көсемі, ғалым Ахмет  Зикебели деген зиялы тұлға бар. Біздің Алихан Бөкейханның замандасы, Стамбул университетінің  профессоры болып, «Түрік тарихы» атты еңбегін жазған ғалым. Міне сол ұстазымыз «Кез келген тарихшы болатын адам төрт тілді білуі қажет. Ол ана тілі, өз тілінің сыртындағы тіл, түрік, француз және араб тілі. Себебі аталмыш шет тілдері  сол уақыттағы саяси, қоғамдық, әлеуметтік жағдайға байланысты» деп бағдар берген. Менің бұл сөзге қосарым тарихшы, Алаштанушы боламын деген азаматтардың  жиырмасыншы ғасырдың тарихын, экономикасын, саясаты мен әлеуметік-демографиялық жағдайын жетік білуі қажет деп санаймын. Соған сәйкес шағатай жазу, осман жазуы және төте жазуы, латын жазуы сыңды тілдерді терең меңгерген дұрыс. Оған қоса пайымды пікір айта алу үшін әдебиетті ақ пен қара деп екіге бөлмей, барлық түрін оқыған шарт. Жиырмасыншы ғасыр басында саяси қозғалысты зерттеу үшін мамандар тек қана қазақ тақырыбын ғана емес, сол ғасырдағы түрік мұсылман қоғамындағы татарларда, башқұрттарда мен қырым татарларында қандай, және басқа да ұлт өкілдерінде қалай болғаны жөнінде кеңінен білгені жөн. Өйткені тарих деген панорама десек, панораманы толыққанды білген абзал. Сондықтан Алаштанушы болу тек қана Алаш кезеңін білу деген сөз емес. Ол жалпы жан жақты білім иесі болу»,-деді ол бізбен болған қысқа әңгімесінде. Осы бағытта Елдос Тоқтарбай  «Qyr balasy» қоғамдық қоры жанындағы  Әлихан Бөкейхан Алаш ғылыми зерттеу институты және «Барлыбек Сыртанов» Алаштану орталығында 300 ден астам шәкірт тәрбиелеуде. Мұнда ескі жазуды меңгеріп, тарих саласы бойынша дипломдық диссертация жазып жүрген болашағынан зор үміт күтетін мамандар даярлануда.

Жүздесу барысында ҚХА Аналар кеңесі мен «Қазақ аналары - дәстүрге жол» қоғамдық бірлестігінің атынан естелік сый ұсынылып, арнау өлең жолдары да айтылды. Сонымен қатар тарих ғылымдарының докторы Аққали Ахмет қос мейманға өз ризашылығын білдіріп, мұндай кездесудің жастар үшін рухты көтерер тағылымы мол шара екенін тілге тиек етті.  Жиын соңында Атырау университеті Жастар саясаты департаментінің бөлім басшысы Сайран Сабырұлы ақжарма тілегін білдіріп, университет атынан естелік сыйлық ұсынды. Шара соңында Елдос Тоқтарбай бастауымен барша қатысушылар «Жасасын Алаш!» деген ұранды хормен айтып, рухты тебіретендер жалынды күйде қорытындылады.

Тізімге қайта оралу