13.03.2024 139

Х. Досмұхамедов атындағы Атырау университеті 22 жылдан бері балық шаруашылығы саласына қажетті мамандар даярлап келеді. Оқу орнымен «Атырау бекіре балық өсіру зауыты» РМҚК дуальды оқыту жөнінде келсім-шарт жасасқан. Бүгінде студенттер өндіріс орнында іс-тәжірибеден өтуде.  
Дуальды оқытудың мақсаты – өндірісте жұмыс істеу дағдысы қалыптасқан түлектерді даярлау. Атырау университетінің «Балық шаруашылығы және ихтиология» мамандығының білім алушылары балық өсіру зауытындағы жаңа технологиясымен танысып, су маржандарын баптаудың ғылыми-тәжірибелерін тыңғылықты меңгеруде. 
«Оқу жоспары бойынша алған білімімізді балық өсіру зауытында тәжірибемен ұштастырып келеміз. Мұнда балықтарды көзбен көріп, қолмен ұстау мүмкіндігіне ие болдық. Дуальды оқытуда тәжірибелі жұмысышылар бізге өндірісте қызмет істеудің жолын үйретуде», - деді 3 курс студенті Дильназ Ақмурзиева. 
Студенттер зауытта уылдырықтан шайқап шабақ балық өсірудің технологиясын, оларды азықтандыру барысын қадағалайды. Сонымен қатар, білім алушылар биология ғылымдарының кандидаты,  профессор Гульнара Сапарованың жетекшілігінде су маржандарын зиянды паразиттерден қорғаудың  жолдарын  ғылыми тұрғыда зерттейді. 
«1996 жылы институт зоологияға оқуға түстім. Сол кезде ихтиология институты мамандарымен бірлесе Жайық өзенін түгелдей аралап, Каспий теңізінің аумағында да зерттеу жұмыстарын жүргіздік. Сонда ғылыми диссертацияма қажетті материалдарымды жинақтадым», - деді ғалым. 
Профессор дуальды оқыту студенттерді өндіріске бейімдеп, біліктілік дағдыларын қалыптастыруда маңызды рөл атқаратынын айтады. 
Атырау университетінде «Балық шаруашылығы және ихтиология» мамандығы бойынша жалпы саны 23 студент білім алады. 2023 жылы 9 түлек оқу бітіріп, жұмысқа орналасқан. Ал, биыл диплом алатын 7 студент дәстүрлі өндірістік тәжірибеден өтіп жатыр.

Тізімге қайта оралу