Дипломдық жұмыстарды қорғау сәтті басталды

   Гуманитарлық ғылымдар және өнер факультеті Бейнелеу өнері және дизайн кафедрасы бойынша «Бейнелеу өнері және көркемеңбек» мамандығын биыл бітірушілердің арасында күндізгі бөлімді бітірушілердің диплом жұмыстарын қорғау емтиханы басталды. Биылғы диплом қорғаудың ерекшелігі – ашық аспан астында өткізілуі. Аулаға кіреберісте белгілі тәртіппен орналасқан дипломдық жұмыстар мен комиссия отыратын үстел ерекше реңк беруде. Бұрын мұндай үрдіс болмағандықтан, ерекше болып тұрғаны да жасырын емес. Диплом қорғауда алғашқы болып шыққандар: Нұржаубаев Олжас Ахатұлы, Сәндік қолданбалы өнер «Сандық». Исатаева Айымгүл Дәулетбекқызы, Кескіндеме «Қызғыш құс». Жолдасбай Жанар Нұрланқызы, Қазақтың ұлттық нақыштағы заманауи сәукеле топтамалары «Үкілім». Тлеушева Нұрай Амантайқызы, Кескіндеме «Күй анасы - Дина». Тағанова Арайлым Бағытжанқызы, Қазақ ұлттық ер адамдар сырт киімдер топтамасы «Хан». Орынбаева Гүлнұр Ізбасарқызы, Кескіндеме. «Көкжал». Бұлардан өзге дипломдық жұмыстар арасында қазақтың ежелгі тұрмыстық бұйымдары да ерекше көзге түседі. Сондай-ақ тарихқа үңілу де оның тағылымдарын, материалдық ортасын көркемөнер арқылы көрсету қажеттілігінде сөз жоқ. Себебі, қазіргі жаһандану үрдістері ұлттық атаулы мен этникалық, дәстүр атаулының барлығын дерлік басып жаншып келе жатқанда қазақ халқының өзіне тән мәдениеті мен төл өнері, табиғат ортасы біржолата жойылып кетпеуі керек. Ұлтымыздың тарихы, ұлтымызды әлемге мәшһүр еткен адамдар бейнеленген туындылар келешегіміз үшін аса маңызды. Ұлы Абай атамыздың 33-ші қара сөзінде өнер туралы былай делінген: «…егер мал керек болса, колөнер үйренбек керек. Мал жұтайды, өнер жұтамайды. Алдау қоспай, адал өнерін сатқан қолөнерлі – қазақтың әулиесі сол». Диплом қорғау емтиханы әлі де жалғасады.

Тізімге қайта оралу