05.06.2024 256

Қазақстан Республикасының Қаржылық мониторинг агенттігінің ұйымдастыруымен «Қаржы пирамидаларын қалай тануға болады, дропперлер кім және басқа кеңестер заңды қалай бұзбауға болады?» тақырыбында кеңейтілген форум өтті. Іс-шараның басты мақсаты - халықтың қаржылық сауаттылығын көтеру және қаржы пирамидаларының, «дропперствоны» және краудфандингтің белгілерін түсіндіру. Сондай-ақ, интернет желісінде құқыққа қарсы контент жарияланымдарының алдын алу. Форумға министрліктер, жоғары мемлекеттік мекемелер, депутаттар қатысты және Қазақстанның 35 озық жоғары оқу орындарының оқытушы-профессорлары мен студенттер онлайн режимде қосылған. Астана қаласындағы Қаржылық мониторинг агенттігінің бастауымен өткізіліп жатқан шараға Халел Досмұхамедов атындағы Атырау университетінде облыстық мемлекеттік мекемелер басшылары және студенттер онлайн режимде куә болды. Басқосуда блогерлердің заңды қызметін жүргізу үшін заңнама нормаларын яғни салық төлеу, заңсыз контентті жарнамалауға тыйым салу көзделген және жауапкершілікті арттыру тағы сол сияқты маңызды мәселелер талқыланып, ғаламтор алаяқтарынан қорғану, қаржылық сауаттылықты көтеру сыңды көкейкесті тақырыптар ой көкпарына салынды. «Атырау облысы бойынша Экономикалық тергеп-тексеру департаменті - қаржы приамидасының салдарынан сақтану немесе зардап шеккен тұлғалардың арыздары негізінде қылмыстық істерді тергеумен айналысатын құқық қорғау органы. Өткен жылдың мәліметіне сәйкес департаменттің өндірісінде 6 қылмыстық іс қаржы пирамида бойынша тергеліп, сот үкімі шықты. Тұрғындар көп жағдайда «ақшаны еселеп аласың немесе пайызсыз пәтер мен автокөлік ұтып аласың» деген жалаң сөздерге алданып, күмәнді ұйымдарға ақша салып жатады. Кейін алаяқтарға қалай жем болғанын білмей сан соғады. Сондықтан, мұндай іс-шараның тұрғындар үшін, соның ішінде жастар үшін маңызы жоғары»,-деді Атырау облысы бойынша Экономикалық тергеп-тексеру департаменті басқармасының басшысы Бекболат Әнесов. Форумға қатысқан Атырау университетінің басқарма төрағасы-ректор Саламат Идрисов мұндай іс-шара халықтың қаржылық, құқықтық қауіпсіздігі үшін аса маңызды екенін және жастардың қаржылық сауатын ашып, үлкен қатердің алдын алу - басты мақсат екенін тілге тиек етті.

Тізімге қайта оралу