АТЫРАУДА БӨГЕТ САЛҒАН СТУДЕНТТЕР МИНИСТРДІҢ АЛҒЫС ХАТЫН АЛДЫ
Атырау қаласын тасқын судан қорғау жұмыстарына қатысқан студенттер мен олардың ата-аналары ҚР Ғылым және жоғары білім министрі Саясат Нұрбектің алғыс хатымен марапатталды. Министрдің алғыс хатын бөгет салу жұмыстарына белсене қатысқан 975 студент және ұл-қызын еңбекқорлыққа баулып, үлгі көрсеткен 242 ата-ана алды. «Министр Атырауға келіп бөгет тұрғызу жұмысын көріп, студенттердің бірлігіне, ұйымшылдығына ризашылығын білдірген еді. Міне, 7 сәуірден бастап бөгет салу жұмыстарына белсене қатысқан студенттер мен оларды еңбекқорлыққа баулыған ата-аналарына Саясат Нұрбектің атынан алғыс хаттар табыс еттік», - деді Х.Досмұхамедов университетінің басқарма төрағасы-ректоры Саламат Идрисов. Атырау облысындағы төтенше жағдайға байланысты құрылған Жедел штаб шешімен оқу орны қаладан 20 шақырым қашықтықтағы Алмалы ауылдық округіне қарасты аумақта 5 шақырымға созылған бөгет тұрғызды. Студенттер 150 мыңға жуық қапты инертті материалдармен толтырып, бөгет салды. Аталған бөгет Жайықтан тасыған мол суды тосып, елді-мекендер мен шаруа қожалықтарын, қаланы тасқыннан қорғауда маңызды рөл атқарды. «Елімізде қиын жағдай болған кезде балаларымыз қаланы қауіптен алып қалуға қатысқанына ризамыз. Көппен бірге болып, су тасқынының зардаптарымен күресуге атсалысқан студенттердің қатарында екінші курс студенті, қызым Аружан да министрдің алғыс хатын алып жатыр. Өте қуаныштымын. Еліміз тыныш, жұртымыз аман болсын. Қазіргі жағдайда Атырау қаласында қауіп сейілді, көңіліміз жайланды», - дейді студенттің әкесі Бейбіт Сариев. Жалпы Алмалыдағы бөгетті салуға 2000-нан астам белсенді студент, 400-ден аса университет оқытушылары мен қызметкерлері қатысты.
ПІКІРЛЕР