Министрдің кеңесшісі Руслан Емелбаев ата-аналармен кездесті
Бүгін Х. Досмұхамедов атындағы Атырау университетіне жұмыс сапарымен ҚР Ғылым және жоғары білім министрінің кеңесшісі Руслан Емелбаев келді.
Іс-сапар мақсаты – Атырау облысының ата-аналарымен кездесу. Ғылыми кеңес залында өткен жиынды университеттің басқарма төрағасы-ректоры Саламат Идрисов ашып берді.
Өз сөзінде ректор облысымызға келген қонақты таныстырып, білім саласындағы қазіргі қалыптасқан жағдай туралы баяндады.
Жиында білім берудегі басым бағыттар, гранттардың бөлінуі, ұлттық бірыңғай тестілеу және кәсіптік бағдар туралы да айтылды.
– Қазір көп жағдайда түлектердің мамандық таңдауы процесіне ата-аналары араласып, шешім қабылдап жатады. Ал біздің қазақи менталитет сол – үлкенді құрмет тұту, оның айтқан кеңесіне құлақ асу. Негізі ата-ана баласының мамандық таңдауына ықпал етсе, онда қажетті және ауқымы кең мамандықтарға қарай бағыттағаны дұрыс деп есептеймін. Содан соң ол мамандыққа бөлінетін грант пен тестілеу қорытындысын есепке алуы керек. Өйткені кейбір мамандықтарға 50-60 баллмен грантқа түсу мүмкіндіктері бар, – деді Р.Емелбаев.
Кездесу соңында ата-аналар өз сұрақтарын қойып, ойларымен бөлісті.
ПІКІРЛЕР