Мұнай-газ, экологиялық бағыттардағы салалық журналистиканың ерекшеліктері
Х.Досмұхамедов атындағы Атырау университетінде «Мұнай-газ, экологиялық бағыттардағы салалық журналистиканың ерекшеліктері» атты семинар өтті.
Қазақстан Республикасы мәдениет және ақпарат министрлігі ұйымдастырған шараға министрлік өкілдері, журналистер, Атырау университеті журналистика және қоғаммен байланыс кафедрасының профессор-оқытушылар құрамы мен студенттері қатысты.
«Өңіріміздегі өзекті мәселелерді жариялау кезінде БАҚ пен жергілікті атқарушы органдар арасындағы коммуникацияларды жетілдіруге, кәсіби журналистерден қазір білім алып жатырған журналист-студенттеріміз тәжірибе алмасып, біліктілігін арттыруға бағытталған жақсы семинар жұмысы ұйымдастырылып отыр екен. Төртінші билік өкілдерінің өзекті сұрақтары да жеткілікті. Семинардың өтуіне ұйытқы болған - ҚР мәдениет және ақпарат министрлігіне ризашылығымды білдіремін. Атырау өңіріндегі мұнай-газ саласы, мұнайдың пайдасы, экологияға әсері - қазір журналистер тарапынан көтеріліп жүрген мәселе. Дегенмен семинар барысында әлі де өз журналисттеріміздің сауаттылығын бұдан әрі арттырып, «қазба байлықтарымызды өндіруші үлкен мекемелерде қалай жұмыс жасау керек?, халықпен қалай байланысу керек?» деген сұрақтарға жауап алады деп ойлаймын», - деді басқарма төрағасы-ректор Саламат Идрисов кіріспе сөзінде.
ҚР мәдениет және ақпарат министрлігі БАҚ саласындағы мемлекеттік саясат департаментінің директоры Қайнар Қаниұлы «Масс-медиа туралы» заңның негізгі ережелерін, өзгерістерді түсіндіре отырып, журналистердің қоғамдағы статусын көтеру, мемлекеттік басылымдардың тендерге қатыспай гранттық қаржыландыруға ие болуы секілді қатысушылар тарапынан қойылған сұрақтарға жауап берді.
«Өздеріңіз білесіздер, журналистер мемлекеттік органдардан қажетті ақпаратты ала алмаймыз, кешіктіреді деп ренжіп жүруші еді. Ақпарат жазу барысында журналистер бұрын 7 күнде ақпарат алатын болса, соңғы қабылданған заңнамаға сәйкес 5 жұмыс күніне қысқартылды. Шұғыл ақпараттар алу мәселесінде 3 күнге дейін қысқартылса, төтенше жағдай кезінде 2 сағаттың ішінде мемлекеттік орган өкілдері БАҚ қызметкеріне хабар таратуы міндеттелді. Бұл да - журналистердің жұмысын барынша жеңілдетуге бағытталған заң жүйесі. Келесі кезектегі үлкен мәселе гранттық қаржыландыру жұмысы да қолға алынып жатыр», - деп нақтылап өтті ҚР мәдениет және ақпарат министрлігі БАҚ саласындағы мемлекеттік саясат департаментінің директоры Қайнар Ахетов.
Мұнай-газ секторы, инфрақұрылым, өңірлік экологиялық мәселелер, қоғамның психологиялық қауіпсіздігі секілді өзекті тақырыптар төңірегінде «Ембімұнайгаз» АҚ қоғаммен байланыс тобының жетекшісі Ғалия Қаражанова, Халықаралық Еуразиялық Телерадио Академиясының академигі, филология ғылымдарының кандидаты, доцент Мәншүк Мұқашева, «Балаларға қосымша білім беру» оқу-әдістемелік және ғылыми-практикалық орталығы психологиялық зерттеу және сараптау бөлімінің басшысы Шынар Тукенова, ««Мағыналы бизнес» PR-агенттігі» ЖШС құрылтайшысы және бас директоры Лаура Сулейменова, Атырау облыстық «Прикаспийская коммуна» қоғамдық-саяси газетінің журналисі Тимур Казиев, «Атырау» облыстық қоғамдық-саяси газетінің бас редакторы Назарбек Қосшиев, Х.Досмұхамедов атындағы Атырау университеті журналистика және қоғаммен байланыс кафедрасының аға оқытушысы Ләззат Мажитовалар баяндама жасап, семинарға қатысушылардың сұрақтарына толықтай жауап берді.
Оқыту іс-шарасына қатысушылар мұнай-газ саласының негіздері және қалыптасу тарихы, энергостатистикамен жұмыс істеу ерекшеліктерімен танысып, мұнай-газ өнеркәсібіндегі оқиғаларды талдау дағдыларын меңгерді.
Жиын соңында ҚР мәдениет және ақпарат министрлігі БАҚ саласындағы мемлекеттік саясат департаментінің директоры Қайнар Қаниұлы қорытынды сөз сөйлеп, семинарға қатысушыларға ризашылығын жеткізді.
ПІКІРЛЕР