Ұлы қаламгер Бейімбет Майлиннің әдеби мұрасы насихатталды
Х.Досмұхамедов атындағы Атырау университетінде Бейімбет Майлиннің туғанына 130 жыл толуына арналған «Ұлылардың ұлағаты» атты мәдени шара өтті.
Ғылыми кітапхана мен қазақ тілі мен әдебиеті кафедрасының студенттері бірігіп ұйымдастырған шараның негізгі мақсаты - ұлы жазушының шығармашылығы мен өмір жолын насихаттап, студенттердің әдебиетке деген қызығушылығын арттыру.
Шараға Атырау университеті ғылыми кітапхана ұжымы, оқытушы-профессорлар қауымы мен студенттер қатысты.
Бейімбет Майлин – «Үш бәйтеректің» бірі, қазақ әдебиетін қалыптастырушылардың бірі, поэзия, проза, драма саласында бірдей өнімді еңбек еткен классик жазушы. Оның «Шұғаның белгісі», «Раушан коммунист» атты адалдық пен сүйіспеншілік, адамгершілік пен қайырымдылық сияқты мәңгілік құндылықтарды насихаттайтын шығармалары қазақ әдебиетінің алтын қазынасына айналды.
Ғылыми кітапхана жетекшісі Жомарт Ибатоллаұлы құттықтау сөз сөйлеп, жиынды ашып берді.
Әдеби-танымдық шара барысында Бейімбет Майлиннің өмірінен сыр шертетін бейнежазба көрсетіліп, қаламгердің туындылары туралы тың деректер мен құнды мәліметтер айтылды.
Бір топ студенттер ақынның өлеңдерін мәнерлеп оқыса, Берік Асемай, Айгерім Жайсаңбекқызы сынды ақынжанды студенттер қаламгерге арнау өлеңдерін көпшілікке паш етті.
Тақырыпты ашу мақсатында Бейімбет Майлиннің өмірдеректерінен викторина ұйымдастырылып, Бейімбет Майлиннің әдеби мұрасын насихаттау мақсатында жиынға қатысушылармен «шығарманы тауып көр» атты қызықты ойын ойнатылды.
Іс-шара соңында қазақ тілі мен әдебиеті кафедрасының оқытушысы, магистр Милена Саматқызы сөз алып, шараны ұйымдастырған ғылыми кітапхана ұжымына, қазақ тілі мен әдебиеті және филология мамандығының студенттеріне алғысын білдірді.
ПІКІРЛЕР