Заң және журналистика
Х.Досмұхамедов атындағы Атырау университетінде Атырау облысы ПД баспасөз хатшысы Мейірім Ердәулет «Заң және журналистика» тақырыбында қонақ дәріс оқыды.
Дәріске Журналистика және қоғаммен байланыс кафедрасының профессор-оқытушылары мен 3-курс студенттері қатысты.
«Журналист мамандығының бір ерекшелігі - олар әртүрлі салада жұмыс істей алады. Кім біледі, мүмкін біздің студенттеріміз де осылай полиция департаментінде, мүмкін мұнай саласында қызметте жүреді. Жақсы оқысаңыздар болашақта мүмкіндіктеріңіз өте көп», - деді алғы сөзінде Журналистика және қоғаммен байланыс кафедрасының меңгерушісі, қауымдастырылған профессор Өмірбек Бекежан.
Дәріскер Мейірім Ердәулет полиция департаментіндегі баспасөз қызметінің ерекшелігі, жаңа қабылданған «Масс медиа» туралы заң ережелері, журналистиканың қыр-сыры туралы түсіндіріп, өмірлік тәжірибесімен бөлісті.
Дәріс барысында студенттер ақпараттың бұрмалануы, төтенше жағдайдағы журналисттің әрекеті, әлеуметтік желіні дұрыс жүргізу мәселесі секілді толғандырған сұрақтарына жауап алып, ашық пікірталас орын алды.
«Тақырып таңдаудан жаңылмаңдар. Тақырып – мақаланың жалпы мазмұны. Газет болсын, тележурналистика немесе сайтпен жұмыс жасасаңыз да бірінші тақырып қойып білу керек. Тақырыпты оқығанда елең ете қалу керек»,- деп өз тәжірибесімен бөлісе отырып, дәріскер білім алушыларға тақырыпты дұрыс қоюға қатысты тапсырмалар берді.
Дәріс соңында студенттер үлкен мотивация алғанын жеткізіп, журналист Мейірім Ердәулетке алғыстарын айтты.
ПІКІРЛЕР