Құмар ойынның зардабы ауыр
Х.Досмұхамедов атындағы Атырау университетінде құмар ойынның алдын алу мақсатында кездесу өтті.
Кездесуде бұрынғы лудомания құрбаны болған азамат өкінішімен бөлісіп, құмарпаздықтан сақтануға шақырды.
Оқытушы-профессорлар мен студенттер қатысқан шарада адам өмірінде негативті тұрғыдан басым рөл ойнайтын, әлеуметтік, кәсіби, материалдық тұрғыдан және отбасылық құндылықтардың төмендеуіне әкелетін патологиялық ойын құмарлығы – лудомания туралы толыққанды ақпарат берілді.
«Құмарлық ауруларының 210 түрі бар. Солардың бірі, әрі қауіптісі – лудомания. Осы құмарлыққа қарсы жүргізіп жатырған жұмыстарымыздың ішіндегі ең үлкен жеңісіміз - қоғамдық орындардағы, әсіресе, әуежай, теміржол вокзалындағы жарнамаларды алып тастау болды»,- деді «Жаңа өмір» психологиялық қолдау орталығының басшысы Талғат Агисов.
Жиында студенттерге лудомания құрбаны басынан өткен ауыр тағдырын баяндап берді.
«Өзім 12 жылымды осы ойындарға арнап, ағайын-туыстарымнан, достарымнан қол үзіп, құмар ойындарының құрбаны болдым. Қазақстан бойынша лудомания дерті қатты өршіп тұр. Сондықтан, «Respublica» партиясының қолдауымен Атырау қаласынан адамдарға көмектесетін орталық аштық. Бұнда ойындарға құрбан болған кез келген адам келе алады»,- деді лудомания құрбаны Тимур Рамазанов. Сондай-ақ орталық маманы көмек сұраған азаматтардың жеке бас құпиялығы қатаң сақталатынын да ескертті.
Еркін форматта өткен кездесу соңында Х.Досмұхамедов атындағы Атырау университетінің әлеуметтік мәселелер және жастар саясаты жөніндегі проректоры Ләйлә Қойшығұлова арнайы келген қонақтарға алғыс хаттар табыстап, келелі кездесу үшін ризашылығын білдірді.
ПІКІРЛЕР