Шетелдік студенттермен кездесу өтті
Х.Досмұхамедов атындағы Атырау университетінде шетелдік студенттерге арналған ақпараттық кездесу өтті.
Кездесудің негізгі мақсаты - шетелден келген студенттердің білім алу сапасын арттыруға, Қазақстанға бейімделу процесін жеңілдетуге және құқықтық қауіпсіздікті қамтамасыз етуге бағытталған.
Жиынды әлеуметтік мәселелер және жастар саясаты жөніндегі проректор Ләйлә Ерболатова жүргізіп, шетелдік студенттер ұстанатын заң талаптары мен ішкі ережелер туралы таныстырып өтті.
Шетелдік студенттермен өткен кездесуде талқыланған басты тақырыптар - Қазақстандағы ЖОО-ларда шетелдік студенттерді оқыту ерекшеліктері, заң мен тәртіп, дәстүрлі құндылықтар, психологиялық қолдау, медициналық қызметтерге қолжетімділік және көші-қон заңнамасы және құжаттарды рәсімдеу.
Осы тақырыптарға сәйкес көші-қон заңнамасын сақтау мәселелеріне ерекше назар аударылды. Атырау қаласы полиция басқармасы көші-қон қызметі бөлімінің аға-инспекторы, полиция аға лейтенаты Айзада Құттыбаева шетелдік азаматтардың Қазақстандағы болу ережелері туралы сөз қозғап, миграциялық заңнаманы сақтау мәселелері бойынша тың ақпараттармен бөлісті. Білімгерлерге тұрғылықты жер бойынша тіркелу және виза рәсімдеу тәртібі туралы ақпарат беріп, еліміздегі заң мен жауапкершілік туралы кеңінен түсіндірді.
Кездесу барысында әлеуметтік мәселелер және жастармен жұмыс жөніндегі бөлімнің жетекшісі Сайран Сабырұлы шетелден келген студенттердің жатақханаға орналасуы бойынша сұрақтарына жауап беріп, университет жанынан құрылған студенттік ұйымдарды таныстырып, бірге жұмыс жасауға шақырды. Сондай-ақ бейімделу процесінде психологиялық қиындықтар туындаған жағдайда арнайы психолог маманның көмегіне жүгінуге болатынын атап өтті.
Х.Досмұхамедов атындағы Атырау университетінде 70 шетелдік студент білім алуда. Ақпараттық кездесу арқылы білімгерлер құқықтық сауаттылығын арттыра отырып, бірқатар сауалдарына жауап алды.
ПІКІРЛЕР