28.09.2022 174

Саналы ғұмырында Атырау университетінің дамуына үлес қосқан, өңірде мамандар дайындауда өзіндік дара жолы бар ардагер ұстаз Ғаппар Темірғалиұлының есімі ешқашан ұмытылмақ емес. Осы орайда 1 қазан – Халықаралық қарттар күні қарсаңында 28 қыркүйек күні Х.Досмұхамедов атындағы Атырау университетінде көптілді білім беру факультеті шетел тілі кафедрасының ұйымдастыруымен доцент Темірғалиев Ғаппар Темірғалиұлы атындағы атаулы аудиторияның ашылу салтанаты өтті. Аталмыш шараны Басқарма-төрағасы Саламат Нұрмұханұлы ашып, ұстаздың сан қырлы қызметіне тоқталып, болашақ ағылшын тілінің мамандарын даярлауда ардагер ғалымның жасаған жұмыстары еш ұмытылмайтынын жеткізді. Жиында Ғаппар Темірғалиұлының жанұясы, шәкірттері, ардагер ұстаздар да қатысты. Атап айтар болсақ, филология ғылымдарының докторы Жүсіп Қадір Өтегенұлы ұстаз жайлы естеліктерімен бөлісіп, жүрекжарды өлеңін арнады. Атырау облысының құрметті азаматы, қоғам қайраткері Мадина Ғабдусалимова: - Бүгін өткенге оралып, өлгенді тіріліткен күн деуге болады. Ғаппар ағамыздың ортамыздан кеткеніне 25 жыл өтіпті, сол кезден бері талай рет қолға алынған бұл жұмыс бүгін міне өз дегеніне жетті. Осыны ұйымдастырған сіздерге үлкен рақмет,- деп, университет ұжымына өз алғысын жеткізді. Халық ағарту ісінің үздігі Ғаппар Темірғалиевтің өлшеусіз еңбегін өскелең ұрпаққа дәріптеу мақсатында аудиторияда ғылыми-әдістемелік еңбектері, жарық көрген мақалалары орналастырылған.

Тізімге қайта оралу