24.11.2022 414

Қазақтың Қыз Жібегі... Сұлулық пен іңкәрліктің, адалдық пен парасаттылықтың нышаны... Бұл сөздер Сұлтан Қожықовтың «Қыз Жібек» фильмінде басты рөлді сомдаған актриса Меруерт Өтекешоваға арнап айтылғандай. 1970 жылы «Қыз Жібек» фильмі бастау алғаннан соң Қыз Жібек пен Төлеген – пәк махаббат пен шынайы сезімнің дәлеліне айналғаны сөзсіз. Осындай сезімге арқау болған «Қыз Жібек» фильмі қазақ киносының алтын қорына енді. Ал осы кинодағы басты рөлді сомдаған Меруерт Қаратайқызының сұлулығына тәнті болған халық әрдайым оны «Қыз Жібек» деп таниды. Бүгінгі күн Х.Досмұхамедов атындағы Атырау университетінің студенттері үшін тарихи сәт, жарқын естелік болып қалмақ. Өйткені, университет жастарына Рахымжан Отарбаев шығармашылығына арналған IV Республикалық театр фестивалі аясында қазақ киносы мен театрының актрисасы, Қазақстан Республикасының еңбек сіңірген артисі, «Құрмет» орденінің иегері Меруерт Өтекешовамен әңгіме өрбітудің сәті түсті. Тағылымы мол кездесудің бас кезінде Меруерт Қаратайқызы шын өмірдегі «Төлегені» Құман Нұрмұханұлы жайлы жақсы естеліктерімен бөлісіп, нағыз махаббаттың ешқашан қартаймайтындығын тағы бір дәлелдегендей болды. Рухани жиын барысында актриса жастарға үлгі өнеге ретінде ақыл-кеңесін айтып, «Қыз Жібек» фильміндегі қызықты естеліктерімен бөлісіп, студенттердің сұрақтарына жауап берді. Осыдан жарты ғасыр бұрын қалың көрерменнің көңілінен жол тапқан махаббат хикаясы сол кездегі көп жастарды өзіне ғашық қылғаны белгілі. Бүгінде тарихи туындының жанкүйерлері әлі күнге дейін «Қыз Жібек пен Төлегеннің» махабаттарына деген шынайы сезімдерін жасырмақ емес. Бұған дәлел кездесуге арнайылап келген Атырау қаласы тұрғынының 50 жылдан астам уақыт бұрын жарық көрген журналдағы Қыз Жібек бейнесін, фильм туралы жарияланған мақалаларды табыстауында. Актриса сомдаған Қыз Жібек, міне, жарты ғасырдан астам уақыт бойы халқымызбен бірге жасайтын сәулелі бейнеге айналды. Көрерменнің оған деген ықыласы мен ілтипаты ешқашан жоғалған емес.

Тізімге қайта оралу