14.04.2024 449

Атырау облысында екі университет 10 шақырым бөгет тұрғызып жатыр. Атырауға жұмыс сапары аясында ғылым және жоғары білім министрі Саясат Нұрбек Алмалы және Бесікті ауылдарында тасқын судан қорғауға бөгет құрып жатқан азаматтарға қолдау көрсетіп, алғыс білдірді. Х.Досмұхамедов атындағы Атырау университеті мен С.Өтебаев атындағы мұнай-газ университетінің қызметкерлері мен ерікті студенттері Жайық өзені арнасын бекітуді үздіксіз жалғастырып жатыр. Бөгет тұрғызу жұмыстарына 2500 ерікті студент, 400-ге тарта қызметкер белсенді қатысып жүр. «Сіздердің күш-қайраттарыңыздың арақасында қаланы қорғайтын маңызды бөгет салынып жатыр. Жұмыла көтерген жүк жеңіл! Барлықтарыңызға азаматтық танытып, аянбай еңбек етіп, ерлік көрсетіп жатқандарыңыз үшін алғыс білдіремін!», - деді министр Саясат Нұрбек. Атырау облысында құрылған Жедел штабтың нұсқауымен универсиеттер қала іргесіндегі Алмалы және Бесікті елді мекендерін тасқын судан қорғайтын биік бөгеттердің 80 пайызын аяқтаған. Университетке бөлінген аймақта жергілікті компаниялар техникамен қамтасыз етіп, бөгет тұрғызуды тәулік бойы жүргізіп келеді. Бөгеттің тасқын суға беріктігін арттыру үшін студенттер мен оқытушы профессорлар қапқа жеделдете топырақ толтырып әзірлеп, тоспаны бекемдеп жатыр. Университеттердің Жедел штабы студенттер мен қызметкерлерді қажетті құрал-сайманмен қамтасыз етіп, жылы шатырлар тігіп, ыстық тамақ дайындап, тасымалдаушы автобустарды қалтықсыз ұйымдастыруда. Межелі уақытта жедел әрі тасқынға берік 10 шақырымға созылған бөгет жұмысы аяқталады.

Тізімге қайта оралу