САРАЙШЫҚТА ОҚУ-АРХЕОЛОГИЯЛЫҚ ТӘЖІРИБЕСІ СӘТТІ ӨТУДЕ
Сарайшық қаласының қазақ тарихында алатын орны ерекше. Ел президенті Қасым-Жомарт Кемелұлы «Алтын Орда заманында маңызды рөл атқарған ежелгі Сарайшық қаласының Қазақстан аумағында орналасуы тегін емес. Бұл төл тарихымыздың тамыры терең екенін көрсетеді. Біздің бабаларымыз қала салып, жаңа мәдениетке жол ашқан. Әйгілі Сарайшық – соның айқын дәлелі»,-деп атап өткен болатын. Осы ретте университет басшылығының қолдауымен оқу-практикалық тәжірибе өтетін жер ретінде ортағасырлық Сарайшық қаласы таңдалды.
Оқу-археологиялық тәжірибеден өтуші студенттерді университет ректоры Саламат Нұрмұханұлы сәт-сапар тілеп шығарып салды. Студенттер тәжірибенің алғашқы күндері Сарайшық сапар орталығымен, музеймен және археологиялық қазба орнымен танысып,көптеген мағұлмат алды. Сарайшық музей қорығының директоры, т.ғ.д. Әбілсейіт Мұхтар қарсы алып, студенттерге сәттілік тіледі. Сонымен қатар «Ортағасырлық Қазақстан тарихының келелі мәселелері» тақырыбында студенттермен кездесу өткізді.
Жалпы, археологиялық қазба нысан аумағы 35*45 м аумақта алып жатыр. Оқу-археологиялық тәжірибе басталғалы көлемі 75 кв² жерге қазба жұмыстары жүргізілді. Студенттер бүгінгі күнге дейін №6, №7, №13 секторларда қазба жұмыстарын жүргізуде. Осы оқу-археологиялық практика барысында студенттер археологиялық қазба жұмыстары әдістерін үйреніп жатыр. Соның ішінде, жәдігерлерді тазалау, сақтау және оларға сипаттама беру жолдары, металл іздегіш құрылғы көмегімен нумизматикалық жәдігерлерді анықтау, адам сүйектерінің морфологиялық көрінісі арқылы сипаттама жазылды.
Оқу-археологиялық практикаға универстиет археологы Амангелді Зайнов, т.ғ.к. Серік Қуаныш және Сарайшық музей қорығының аға ғылыми қызметкері, археолог Жүніс Байғалиев жетекшілік етуде. 19 студент Оқу-археологиялық тәжірибеден өтуде.
ПІКІРЛЕР